Eg tek til med å orsake for at du ikkje fekk tilbakemelding på tweeten som du refererer til. Eg får vere så ærleg å seie at det skuldast at eg ikkje hadde noko godt svar. Du kom med ei tilbakemelding som vart teken til etterretning, men utan noko spørsmål eller konkrete forslag som det var naturleg å kommentere. Men du burde nok ha fått ei melding om at tweeten var lest, så orsak for det.

Imidlertid har vi gjort fleire endringar som følge av tilbakemeldingar frå deg og andre, mellom anna er det no mogeleg å å minimere boblene og informasjonsflashen som du mislikar. At sidene er personfokuserte kan vere rett. Det er ei smakssak korvidt dette er positivt eller negativt. Dersom målet er å gjere folk betre kjent med dei som skal representere Venstres sine velgarar på Stortinget til hausten, er det etter mi meining positivt.

Liberal.no er ein arena for deltaking og dialog, men i delar av valkampen vil den også vere det første nye veljarar møter når dei er nysgjerrige på Venstre. Til dømes vert det linka frå nettannonser til portalen. Då er det etter vår meining nødvendig at sidene også informerer om politikk, jfr boblene øverst (del av heilskapleg kampanjedesign), og gjev ein enkel veg til vidare informasjon på venstre.no (kjem). At du ikkje likar designet på bevegelege bobler får vi berre ta til etterretning, men også det må vel kategoriserast som smak og behag.

Eg synes Krf24 var eit fint konsept, endå finare vert det dersom dette ikkje er den einaste gongen dei køyrer konseptet i løpet av valkampen. Vi har i utgangspunktet ikkje planlagt liknande 24-timarsgimmickar, men planlegg live nettmøter med ulike politikarar i tillegg til aktiviteten som foregår på liberal.no. Dessutan er det framleis slik at vi har ei målsetning om å svare alle som stiller spørsmål via Venstres profilar på kanalar ”der folk er”, som du skriv – den enkelte politikar har vonlegvis liknande mål for sin eigen tilstadeverelse.

Liberal.no er ikkje meint å trekke merksemda bort frå andre kanalar, men å vere ein arena der folk veit dei finn Venstrefolk. Venstre har i mange år hatt kanalar for debatt på forum som ikkje er opne, vi håpar at dette kan trekke debatten ut i det opne, og kven veit: kanskje at ikkje-Venstremedlemmer også vil finne det interessant å debattere vidare.

Ellers opplever eg at mykje av kritikken din grunnar i designvalg og mangel på menyar. Det er heilt grei kritikk, men neppe noko som vil endrast før valget. Vi tek det med oss likevel!